Gjykata Themelore në Ferizaj ua ka vazhduar masën e paraburgimit edhe për dy muaj, dy të dyshuarve për vrasjen e 18-vjeçares M.O në Ferizaj, Dardan Krivaqa dhe Arbër Sejdiu.
Kërkesën për caktimin e masës së paraburgimit ndaj dy të dyshuarve për veprën penale “Vrasje e rëndë”, Prokuroria Themelore në Ferizaj e ka bërë më 17 janar.
Lajmin për vazhdimin e masës së paraburgimit për dy të akuzuarit e kanë konfirmuar nga zyra për informim në Gjykatën Themelore në Ferizaj.
Rasti vazhdon të jetë në procedurë hetimore.
I akuzuari tjetër, Arbër Sejdiu ishte arrestuar më 24 gusht 2021, pasi që sipas Prokurorisë Themelore në Ferizaj, i dyshuari Sejdiu kishte marrë pjesë në ushtrimin e dhunës fizike dhe psiqike ndaj tani të ndjerës M.O.
Ndryshe, i pandehuri Krivaqa dyshohet se më 22 gusht 2021, në Ferizaj, në banesën e tij, me dashje, në mënyrë mizore për motive të ulëta, një natë përpara kishte ushtruar fillimisht dhunë psikike, pastaj edhe dhunën fizike, e cila kishte vazhduar edhe ditën kritike, derisa e ndjera kishte ndërruar jetë.
Tutje, siç thuhet në kërkesë, i pandehuri Sejdiu kishte qenë i pranishëm gjatë gjithë kohës dhe kishte kontribuar në mënyrë të drejtpërdrejtë në kryerjen e veprës penale gjegjësisht vdekjen e të ndjerës, dhe më pas të njëjtën e kishin dërguar dhe lënë në Spitalin e Përgjithshëm në Ferizaj, pa shenja jete, shkruan për “Betimi për Drejtësi”, ndërsa dy të pandehurit kishin ikur në drejtim të panjohur.
Për këtë, prokuroria thotë se në bashkëkryerje kanë kryen veprën penale “Vrasje e rëndë” nga neni 173 paragrafi 1, nën paragrafi 1.4 dhe 1.8 lidhur me nenin 31 të Kodit Pena, vepër me të cilën kryesi dënohet me burgim jo më pak se 10 vjet ose me burgim të përjetshëm.
