Sot, 20 vjet nga Masakra në Burgun e Dubravës, krerë shtetëror të nivelit lokal dhe qendror, u mblodhën në Varrezat e Dëshmorëve të Kombit të Ushtrisë Çlirimtare të Kosovës në Ferizaj, për t’i bërë homazhe pranë varrin, jetës, veprës dhe sakrificës së Dëshmorit të Kombit, Enver Topalli.

Kryetari i Ferizajt, Agim Aliu bashkë me deputetët e Kuvendit të Republikës së Kosovës, Elmi Reçica dhe Mexhide Mjaku Topalli, kryetarin e Shoqatës së Familjeve të Dëshmorëve në Ferizaj, Gafurr Bytyçin, kryetarin e OVL-së së UÇK-së në Ferizaj, Rafiz Sejdiu, familjarë të dëshmorit Topalli dhe qindra qytetarë vendosën kurora lulesh në varrin e Dëshmorit të Kombit, Enver Topalli në 20 vjetorin e rënies së tij, në Masakrën e Dubravës.

Familjarë, miq dhe drejtues të shtetit, në këtë përvjetor të 20-të, me dhembje e krenari nderuan sot veprën sublime të Dëshmorit të Kombit, Enver Topalli.

Me dhembje e pikëllim, por edhe krenari, në 20 vjetorin e rënies, Dëshmorin e Kombit e përkujtoi i biri i tij, Edlir Topalli.

“Sot jemi mbledh ta përkujtojmë babin në 20 vjetorin e rënies në Burgun e Dubravës, një ditë e dhembshme që duhet me përkujtu, lavdi për të gjithë dëshmorët e Kosovës që kanë rënë e kanë dhënë jetën, që ne sot të jemi të lirë, ta gëzojmë lirinë” tha Edlir Topalli, i biri i Dëshmorit të Kombit, Enver Topalli.

Kryetari i Shoqatës së Familjeve të Dëshmorëve në Ferizaj, Gafurr Bytyçi vlerësoi lartë heroizmin e Dëshmorit të Kombit, Enver Topalli dhe sakrificën e gjithë dëshmorëve dhe të rënëve për lirinë e Kosovës.

“Sot është dita kur në mënyrën më monstruoze, më makabre, soldateska serbe i vrau njerëzit, i bombardoi njerëzit në Burgun e Dubravës. Me të gjitha të drejtet ndërkombëtare, në gjithë botën të burgosurit e kanë një garancion nga shteti që i ka burgosur por shteti që i ka burgosur afër 200 djem të rinj shqiptarë, patriotë, i ekzekutoi në mënyrën më makabre në Dubravë. Në grupin e atyre njerëzve që u ekzekutuan në Dubravë ishte edhe Enver Topalli, Ahmet Hoxha nga Ferizaj. Ne si shoqatë e familjeve të dëshmorëve dhe si komb patjetër se krenohemi me jetën dhe veprimtarinë e Enver Topallit i cili nuk kurseu asgjë nga jeta për kombin dhe atdheun” tha Gafurr Bytyçi, kryetar i Shoqatës së Familjeve të Dëshmorëve në Ferizaj.

Përkujtimi për Dëshmorin e Kombit, Enver Topalli vijoi edhe në Greme, në shkollën e fshatit që mban emrin e tij, ku në ditën e shkollës, drejtuesit e shkollës dhe nxënësit kishin përgatitur një program kulturor- artistik.

Bëje LIKE dhe merr lajmin e fundit nga Ferizaj24:

Përmbajtjet që i merr Ferizaj24 nga burime tjera nuk i nënshtrohen licencës Creative Commons 1.0, e cila përndryshe është e zakonshme, për përmbajtjet të cilat i plason kjo platformë mediatike. Ju lutemi, konsultohuni me buruesit për marrje të përmbajtjeve të tilla.

Ferizaj24 botohet në www.ferizaj24.info dhe mund të merren në tërësi, sipas licencës Creative Commons 4.0.