Pas konfirmimit të 2 mijë e 50 rasteve të reja me COVID-19, pritet që shumë shpejt të ketë ndryshim të masave antiCOVID.

Nga Ministria e Shëndetësisë sot kanë konfirmuar për lajmi.net se pritet të ketë ndryshime në masa.

“Ministri është në konsulta të vazhdueshme me ekspertët shëndetësorë dhe duke përcjellë situatën epidemiologjike, bazuar në rekomandimet e të cilëve, së shpejti do të dalim me masa të reja”, konfirmoi ai për lajmi.net.

Ndërsa përpos kësaj tashmë është bërë e ditur se nesër pritet që të mblidhet Komiteti Ndërministror për të shqyrtuar këto masa.

Mbledhja është paraparë të zhvillohet në ora nëntë, kurse sipas KlanKosovës pritet që masat e reja të propozohen në këtë mënyrë:

Gastronomia të punojë deri në orën 21.00.

Të bëhet kusht që të gjithë ata që hyjnë në Kosovë, të jenë me tre doza të vaksinës për Covid-19.

Gjithashtu ora policore pritet të nis nga ora 22.00, megjithatë akoma nuk ka të konfirmuar zyrtarisht.

E në raportin e fundit të rasteve me koronavirus është theksuar se përpos 4 mijë e 50 rasteve në të njëjtën kohë nuk ka pasur të vdekur.

Ndryshe Ministria e Shëndetësisë në bazë të të dhënave të fundit nga Instituti Kombëtarë i Shëndetësisë Publike të Kosovës ka theksuar se së fundi janë kryer 9 mijë e 194 testime.

Tani për tani në gjithë vendin janë 7 mijë e 266 raste aktive.

Tani për tani ora policore në vend është nga ora 00:00 deri në ora 05:00, por me gjasë qytetarët së shpejti do të kenë qarkullim të ndaluar që nga ora 21:00.

Kundër masave antiCOVID dhe caktimit të orës policore ishin pikërisht përfaqësuesit e gastronomisë ata që patën protestuar.

Se si do ta presin ata ndryshimin e radhës, mbetet të shihet gjatë ditëve në vazhdim. E përpos rasteve të shumta me koronavirus, Kosova po përballet edhe me rrezikun e rritjes së çmimeve në faturat e energjisë, në sezonin dimëror kur shumë prej qytetarëve ngrohen pikërisht me rrymë.