Trajnerja e njohur e palestrës dhe ‘bodybuilder’-ja, Mandy Blank, vdiq të hënën, më 29 tetor, konfirmoi Us Weekly. Ajo ishte 42 vjeçe.
Zyra e gjykatës së Los Angeles konfirmoi se Blank u shpall e vdekur në vendngjarje në orën 1:06. Ndërkohë TMZ raportoi se ajo u gjet pa ndjeja në vaskën e saj në shtëpi.
Sipas faqes së internetit, asnjë drogë ose alkool nuk u zbulua në vendngjarje dhe nuk kishte rrethana të dyshimta.
Një raport i autopsisë dhe toksikologjisë është planifikuar për të përcaktuar shkakun e vdekjes.
Mandy Blank
“Unë jam absolutisht e tronditur, sigurisht”, tha shoqja e Blank, Annette Milbers për të përditshmen New York Daily më 31 tetor.
Milbers, e cila tha se e njihte Blank për më shumë se 15 vite, i tha gazetës: “Ajo ishte një person i tillë, e pasionuar dhe e sjellshme. Qëllimi i saj ishte gjithmonë që të shprehte dashurinë nëpërmjet lëvizjes së trupit. Ajo ishte një person shumë i thjeshtë, i cili mund të jetë i rrallë në industrinë tonë”.
Blank filloi karrierën e saj të fitnesit në moshën 18 vjeçare. Një vit më vonë, ajo përfundoi në vendin e pestë në garën Botërore të “Fitness Olympia”. Ajo u bë konkurrentja më e re që fitoi Kampionatin Botëror të Federatës Ndërkombëtare të Bodybuilding-ut dhe Fitnessit (IFBB), në vitin 1998.
Në vitet e fundit Blank ka punuar me disa nga yjet e famshëm të Hollywoodit.
Klientët e saj të listës A përfshijnë emrat e njohur si: Alex Rodriguez, Marcus Allen, Jordana Brewster dhe Mickey Rourke. /Telegrafi/
