Klinika e Syve këtë vit ka arritur që një numër të madh të pacientëve të mos i referojë për shërim jashtë institucioneve shëndetësore publike.
Përderisa në vitin 2019 ishin 469 raste të cilat u referuan për shërim jashtë këtij institucioni, në vitin 2020 kjo ka rënë për 50%, pra vetëm 190 pacientë janë referuar për shërim jashtë Klinikës së Syrit në QKUK.
Kështu është bërë e ditur përmes një komunikate për mediat nga SHSKUK-ja, shkruan Gazeta inFokus.
“Vitin e kaluar, 190 pacientë, që kishin probleme të ndryshme shëndetësore me sy, të cilat nuk janë trajtuar në Kosovë, janë dërguar për shërim jashtë institucioneve publike shëndetësore. Në vitin 2019 u referuan 469 raste, ndërsa në vitin 2018 ishin referuar 527 raste për shërim jashtë institucioneve publike shëndetësore’, thuhet në njoftim.
Komunikata e plotë:
Klinika e Syve shton vëllimin e punës, ulë referimet jashtë vendit
Numri i rasteve të referuara nga Klinika e Syve e Qendrës Klinike Universitare të Kosovës për trajtim jashtë institucioneve publike shëndetësore, ka rënë në më shumë se 50 % gjatë vitit 2020.
Vitin e kaluar, 190 pacientë, që kishin probleme të ndryshme shëndetësore me sy, të cilat nuk janë trajtuar në Kosovë, janë dërguar për shërim jashtë institucioneve publike shëndetësore.
Në vitin 2019 u referuan 469 raste, ndërsa në vitin 2018 ishin referuar 527 raste për shërim jashtë institucioneve publike shëndetësore.
Pas blerjes së aparaturës së re dhe pas trajnimeve të vazhdueshme që kanë ndjekur mjekët, në Klinikën e Syve, gjatë vitit 2020, janë aktivizuar shërbime të reja shëndetësore.
Për një vit, mjekët specialistë të oftalmologjisë kanë kryer 126 operacione në segmentin e pasmë të syrit apo PPV (Pars Plana Vitrectomi), 37 intervenime me Laser Assisted DCR- Dacryocystorhinostomy (operim i kanalit të lotit me laser), 41 raste me Cross-Linking (CXL) tek rastet me Keratokonus dhe 4 ndërhyrje me laserim tek retinopatia te prematurët – ROP (ndërhyrje me laser te fëmijët e lindur para kohe, që kanë problem me enët e gjakut).
Më herët, në pamundësi për të marrë këto shërbime në QKUK, qytetarët e Kosovës janë detyruar të gjejnë zgjidhje jashtë institucioneve publike shëndetësore, në rastin më të vështirë, edhe në vendet e huaja, duke harxhuar mijëra euro.
