Komuna e Ferizajt ka nisur një fushatë vetëdijësuese kundër braktisjes së procesit mësimor nëpër shkolla fillore. Në kuadër të saj, Komuna ka organizuar edhe tryeza të përbashkëta me prindërit e komunitetit ashkali, me OJQ-të dhe me institucionet arsimore, me qëllim që fenomeni i braktisjes së mësimit të parandalohet me urgjencë. Po ashtu, Komuna tashmë ka formuar edhe një ekip profesional për të punuar me rreth 20 familje në fshatin Dubravë, derisa fëmijët e tyre e kanë braktisur mësimin në shkollën fillore “Naim Frashëri”, në fshatin Zaskok të Ferizajt. Gjithashtu rreth kësaj çështjeje është angazhuar edhe Komiteti për komunitete në kuadër të Kuvendit Komunal të Ferizajt.