Drejtoria e Bujqësisë dhe Pylltarisë në Ferizaj ka filluar sot aksionin e vaksinimit të kafshëve të cilat janë pjesë e fermave komerciale, kundër sëmundjeve Clostridiale.
Udhëheqësi i kësaj drejtorie Burim Bajrami, pohoi se duke mbrojtur shëndetin e kafshëve, mbrohet edhe shëndeti i njerëzve, sepse në rast të ndonjë sëmundje që prek kafshët shënohen humbje të mëdha për fermat e fermerët.
“Kemi filluar projekti për vaksinimin e kafshëve shtëpiake gjegjësisht të gjedheve dhe deleve për sëmundjet Clostridiale, ndërsa vlera e projektit është dikun mbi 13 mijë euro, ndërsa do të vaksinohen diku 3 mijë krerë gjedhe, 7 mijë e 500 krerë dele, si dhe 200 krerë dhi”, ka thënë drejtori Bajrami.
Veterinari ferizajas Agron Halimi, është shprehur se ky projekt është shumë i rëndësishëm për fermerët.
“Është projekt shumë i rëndësishëm, sepse mbron shëndetin e kafshëve dhe shëndetin publik, do të ishte mirë që gama e këtij projekti të zgjerohet më shumë”, ka thënë Halimi.
Ndërkaq fermeri Hamdi Baliu i cili në fshatin Neredime ka një fermë të madhe të deleve dhe qengjave thotë se vet nuk do të mund të kryente procesin e vaksinimit ngase është një proces i kushtueshëm.
Projekti i vaksinimit të kafshëve realizohet për çdo vit, ndërsa komunës së Ferizajt sivjet i ka kushtuar rreth 13 mijë euro.
