Ross Edgley është bërë njeriu i parë, që e kaloi not tërë bregdetin e Britanisë së Madhe, duke notuar për më se 3,200 kilometra.

Ai arriti në Margate 157 ditë pasi u nis nga Kenti, ndërsa u përball me valë të fuqishme, rryma ujore, kandil deti dhe mot të ftohtë, transmeton Telegrafi.

Britaniku 32-vjeçar, që ka gjendje shumë të mirë fizike, kaloi ujërat e Anglisë, Uellsit, Skocisë dhe Irlandës, pa e vënë këmbën në tokë dhe theu rekord për notimin më të gjatë në det.

Kur mbërriti në tokë të thatë, u prit prej familjarëve dhe miqve, si dhe shumë pushuesve në bregdet, ndërsa momentin e përshkroi si ‘emocionues’.

“Më falni që u vonova”, iu ka thënë shkurt ai familjarëve, pasi kishte planifikuar që tërë këtë aventurë ta përfundonte për 100 ditë.

Madje, ai është mahitur se ndjehej i zhgënjyer, për shkak se e ka mbajtur fytyrën për aq gjatë në ujë, ndërsa nëna dhe babai nuk u kujdesën që t’ia sjellin një picë.

Edgley e kishte lënë qytezën e Kentit më një qershor, për të notuar në drejtim të kundërt të akrepave të orës dhe nuk e vuri më këmbën në tokë, teksa notonte për 12 orë në ditë edhe gjatë natës.

Përgjatë udhëtimit, ai vuajti prej pickimeve të kandilave të detit, shqyerjes së kostumit të larjes dhe çarjes së gjuhës për shkak të ujit të njelmët.

Gjatë muajit gusht, ai ka hyrë në Librin e Rekordeve të Ginisit pasi me 74 ditë, u bë njeriu që notoi më së gjati duke notuar në det.

Në mënyrë që të mbijetojë në det, Edgley konsumonte nga 15,000 kaloi në ditë, ndërsa pushonte në barkën që e shoqëronte. /Telegrafi/